Հայերեն 
EnglishՄաս 1
ՍՈՒՐԲ ՀՈԳԻՆ ԸՆԴՈՒՆԵԼՈՒ ԱՍՏՎԱԾԱՇՆՉՅԱՆ ՃԱՆԱՊԱՐՀԸ
Մեր այս թեման Սուրբ Հոգով լցվելու մասին է: Ես առաջարկում եմ ուսումնասիրել Գործք առաքելոցը, տեսնել` ինչպես էին առաքյալները դա անում, և օգնել մարդկանց, որ նրանք լցվեն Սուրբ Հոգով: Գործք առաքելոցի աոաջին գլխում մինչև Հիսուսի համբարձվելը մենք ականատես ենք լինում մի հզոր տեսարանի:
Գործք 1.4,5
4. Եվ նրանց միասին ժողովված ժամանակ պատվեր էր տալիս նրանց` Երուսաղեմից չհեռանալ, այլ սպասել Հոր ավետիքին, որ ասաց` Ինձնից լսեցիք:
5. Որովհետև Հովհաննեսը իրավի մկրտեց ջրով, բայց դուք շատ օրեր չանցած Սուրբ Հոգով կմկրտվեք:
Այնուհետև՝ Պենտեկոստեի օրը:
Գործք 2.1-4
1. Եվ երբ Պենտեկոստեի օրերը լրացան, ամենքը միաբան մեկտեղ էին:
2. Եվ հանկարծակի երկնքից մի հնչյուն եղավ` սաստիկ փչող քամու պես, և լցրեց բոլոր տունը` ուր նստած էին:
3. Եվ երևացին նրանց բաժանված լեզուներ, ինչպես կրակից, և նստեց նրանց ամեն մեկի վրա:
4. Եվ ամենքը Սուրբ Հոգով լցվեցին ու սկսեցին ուրիշ լեզուներով խոսել, ինչպես որ Հոգին նրանց խոսել էր տալիս:
Շատ տարիներ առաջ, երբ երիտասարդ հովիվ էի, Նոր կտակարանը կարդալիս Սուրբ Հոգին հայտնություն տվեց ինձ: Ես համոզվեցի, որ ստացել եմ նույն Սուրբ Հոգին և ունեմ նույն նախնական նշանը, որ ունեին առաքյալները, այսինքն՝ այն աստվածաշնչյան վկայությունը, որն է` լեզուներով խոսելը: Ուրիշ ոչինչ ինձ չէր բավարարում: Լեզուներով խոսելը Սուրբ Հոգի չէ, և Սուրբ Հոգին լեզուներով խոսելը չէ. նրանք գործում են միասին:
Սուրբ Հոգով լցված հավատացյալները Սամարիայում
Գործք առաքելոցում տեղ գտած դեպքերը մի քանի տարիների պատմություններ են: Պենտեկոստեի օրվանից ութ տարի անց մենք տեսնում ենք Փիլիպոսին, որը Ավետարանը տանում է Սամարիայի բնակիչներին:
Գործք 8.5-8,12
5. Եվ Փիլիպոսն իջավ Սամարիայի մի քաղաքը` և Քրիստոսին քարոզում էր նրանց:
6. Ժողովուրդներն էլ միաբան ականջ էին դնում Փիլիպոսի խոսածներին` լսելով և տեսնելով այն նշանները, որ անում էր:
7. Որովհետև պիղծ ոգիներ ունեցողների շատերից մեծաձայն աղաղակելով դուրս էին զալիս:
8. Եվ շատ անդամալույծներ և կաղեր բժշկվում էին:
12. Բայց երբ հավատացին Փիլիպոսին, որ ավետարանում էր Աստծո արքայության և Հիսուս Քրիստոսի անունի բաները, ամենքն էլ մկրտվում էին` թե մարդիկ և թե կանայք:
Այս խոսքերն օգնեցին ինձ տեսնել, որ կա մի վերապրում, որը հաջորդում է փրկությանը, և այն կոչվում է ստանալ Սուրբ Հոգի: Ինձ սովորեցրել էին, որ երբ փրկվում ես, այդ ժամանակ էլ ստանում ես Սուրբ Հոգին, և որոշ առումով դա այդպես է: Սակայն իմ եկեղեցում սովորեցնում էին, որ փրկվելուց հետո այլևս ոչինչ պետք չէ, որովհետև ունես Սուրբ Հոգին: Հիսուսն ասաց. «Գնացե՛ք բոլոր աշխարհք, Ավետարանը քարոզեք ամեն արարածի: Ով որ հավատաց և մկրտվեց, կփրկվի, և ով որ չհավատաց, կդատապարտվի» (Մարկ. 16.15,16): Այս սամարացիները հավատացել ու մկրտվել էին (Գործք 8.12): Նրանք փրկվա՞ծ էին: Համաձայն Հիսուսի Խոսքի` այո՛: Վերստին ծնունդն ուղեկցվում է Սուրբ Հոգու գործողություններով, բայց այն չի կոչվում Սուրբ Հոգի ստանալ, այն կոչվում է վերստին ծնվել, ստանալ հավիտենական կյանք: Կա մի վերապրում, որը հաջորդում է փրկությանը, և այն կոչվում է ստանալ Սուրբ Հոգի կամ լցվել Սուրբ Հոգով: Երբ Երուսաղեմում առաքյալները լսեցին այն հիասքանչ գործերի մասին, որ Աստված Սամարիայում կատարել էր Փիլիպոսի ծառայության միջոցով, նրանք ուղարկեցին Պետրոսին ու Հովհաննեսին, որպեսզի ձեռնադրեն նորադարձներին, և նրանք ստանան Սուրբ Հոգին:
Գործք 8.14-17
14. Երբ Երուսաղեմ լինող առաքյալները լսեցին, թե Սամարիան Աստծո Խոսքը ընդունեց, Պետրոսին և Հովհաննեսին ուղարկեցին նրանց մոտ:
15. Որոնք իջան և աղոթք արեցին նրանց վրա, որ Սուրբ Հոգին առնեն:
16. Որովհետև դեռ նրանցից ոչ մեկի վրա չէր իջել, միայն Տեր Հիսուսի անունով մկրտված էին:
17. Այն ժամանակ ձեռքերը դրին նրանց վրա, և նրանք ընդունում էին Սուրբ Հոգին:
Այժմ նրանք, ովքեր դեմ են լեզուներով խոսելուն, պնդում են, թե Աստվածաշունչն այստեղ չի նշում, որ սամարացիները խոսեցին լեզուներով, երբ ստացան Սուրբ Հոգին: Բայց Գրվածքը չի ասում նաև, որ նրանք չխոսեցին: Եկեղեցու պատմությունն ուսումնասիրողները գիտեն, որ վաղ եկեղեցու հայրերը ընդունում են, որ Սամարիայում խոսել են լեզուներով: Բացի այդ, այս հատվածից ակնհայտ է դառնում, որ նրանք խոսել են լեզուներով:
Գործք 8.18,19
18. Սիմոնը երբ տեսավ, թե առաքյալների ձեռք դնելով Սուրբ Հոգին տրվում է, փող բերեց նրանց և ասաց.
19. Ինձ էլ տվեք այս իշխանությունը, որ ում վրա ձեռք դնեմ, Սուրբ Հոգին առնի:
«Երբ Սիմոնը տեսավ...»,– ասում է Խոսքը: Դուք չեք կարող տեսնել Սուրբ Հոգուն: Նա Հոգի է և ֆիզիկապես չի կարող երևալ: Անհրաժեշտ էր որևէ ֆիզիկական նշան, որի միջոցով Սիմոնը կհասկանար, որ նրանք ստացել են Սուրբ Հոգին, մի բան, որ կազդեր նրա զգայարանների վրա: Փաստը ցույց է տալիս, որ նշանը լեզուներով խոսելն էր:
